वासिङटन : अमेरिकी राष्ट्रपति डोनाल्ड ट्रम्पले गत मंगलबार भएको दुई कोरियाबीचको उच्चस्तरीय वार्ताले यी दुई देशको सम्बन्ध सुधारका क्षेत्रमा राम्रो ऊर्जा दिएको भन्दै सकारात्मक देखिएका छन्। हालै दक्षिण कोरियामा सम्पन्न दुई कोरियाबीचको वार्ताको बारेमा बुधबार प्रतिक्रिया दिँदै राष्ट्रपति ट्रम्पले यस्तो धारणा राखेका हुन्। उनले यसबाट सकारात्मक फाइदा लिँदै अगाडि बढ्न र आगामी दिनमा सौहार्द रूपमा वार्ताको माध्यमबाटै सबै समस्याको समाधान गर्ने मार्गमा लाग्न पनि आग्रह गरेका छन्। लामो समयदेखि शत्रुतापूर्ण सम्बन्ध रहेका उत्तर र दक्षिण कोरियाबीच दुई वर्षपछि मंगलबार पहिलोपटक यति उच्चस्तरमा औपचारिक वार्ता भएको हो।
यो वार्तापछि वातावरण निर्माण भएकाले सम्बन्ध सुधारका लागि थप केही गर्नुपर्नेमा दक्षिण कोरियाली राष्ट्रपति मुन जे इनलाई पनि राष्ट्रपति ट्रम्पले आग्रह गरेका हुन्। उक्त वार्तापछि उत्तर कोरियाले दक्षिण कोरियामा आयोजित शीतकालीन ओलम्पिक खेलमा आफ्ना खेलाडी र प्रतिनिधिहरू पठाउने भएको जनाएको छ। दुई वर्षपछि भएको वार्तापछि यी दुई देशको सम्बन्धमा सुधार आएको छ। वार्ता नभाँडियोस् भनी अमेरिकाले दक्षिण कोरियासँगको संयुक्त सैन्य अभ्यास पनि रोकेको छ।बुधबार ह्वाइट हाउसमा पत्रकार सम्मेलनमा उनले भने, ‘वार्तामा धेरै सकारात्मक कुराकानी भएका छन् र आगामी दिनका लागि पनि वार्तामा नयाँ विषयवस्तुले प्रवेश पाएका छन्। कोरियाली प्रायद्वीपमा जारी द्वन्द्व समाधानका लागि शान्तिपूर्ण समाधान आवश्यक छ र यसको विकल्प शान्ति वार्ता नै हो।’ छलफलमा विशेषगरी खेलकुदका विषयमा बढी कुराकानी भएको थियो। उत्तर कोरियाको क्षेप्यास्त्र परीक्षणका बारेमा पनि वार्तामा प्रसंग उठेको बताइएको छ। उक्त वार्तालाई निरन्तरता दिन र कोरियाली प्रायद्वीपमा जारी तनावपूर्ण अवस्थाको सुधार गर्न संयुक्त राष्ट्रसंघले पनि आग्रह गरेको छ।
साभारः अन्नपूर्ण पोष्टबाट
No comments:
Post a Comment